Kalak sibenar megenggeng nimai perbahanen Dibata

Kalak sibenar megenggeng nimai perbahanen Dibata
Tualang, 18 Januari 2008

Mari dage sicubaken sigargari kai kin sura-sura Dibata si ateNa ipesehNa man banta arah kata enda.
1. Selaku kalak Kristen bagepe ibas kegeluhenta selaku mahluk sosial, kita iajuk gelah ngasup sikeleng-kelengen. Enda silakoken sebagai bentuk tanggungjawabta man Dibata si enggo leben nehken keleng ateNa man banta. Nehken keleng ate tentuna bergantung kubas situasi ras kondisi si lit, ingan ras waktu si lit, ras seterusna. Maksud kami ngatakenca, maka , kegeluhenta selaku kalak Kristen bagi ninta rusur, la banci lang, ntah pe sada keharusen guna mersan kayu persilangta ibas kita ngelawan sura-sura dagingta, alu ngkelengi temanta manusia.

2. Ibas sura-suranta nehken kekelengen e, megati kang sialoken si la bagi ukurta, mulai kin arah kata-kata si seh man banta, seh pe perbahanen si menyakitken siakap. Sekalak nabi tergelar Elisa, ia me sekalak nabi si patuh si ngikutken nabi Elia ibas Bethel nari trus ku Yerikho, trus ku pinggir sungai Yordan, ija ijeme nabi Elia nangkih ku Surga. Ibas kuasa si enggo ialoken nabi Elisa, melala hal si luar biasa si enggo ibahanna eme:
1) 2 Raja 2:14; Nabi Elisa menyebrangi sungai Yordan, bagi nabi Musa membelah laut merah.,
2) 2 Raja 2:21; Nabi Elisa membersihken lau si ”beracun” i sungai Yerikho
3) 2 Raja 2:23-24; ija lit 42 anak-anak si mengolok2 ia, maka ikutuk nabi Elisa, seh maka anak-anak ndai i pan beruang ibas kerangen nari, terjadi i bethel.
4) 2 Raja 5:10-14; Panglima Naaman i obatina alu ngataken gelahna igedapkenda 7 kali ku lau Yordan.
Arah kerina enda, teridah uga lit kuasa sibanci ilakoken nabi Elisa, eme erbahan tanda sengget ntah pe kejadin si luar biasa. Selanjutna siidah ibas Pasal 6 enda, kepeken lebih mbue sibanci ituduhken Nabi Elisa kerna kuasa si ibereken Dibata man bana arah kuasa guna nehken kai sura-sura ntah politik raja Aram kempak bangsa israel, maka atena guna menyusun strategi si bersifat rahasia ras la banci ieteh isepe, ikatakenna maka Raja Aram enda menyusun strategi mengepung bangsa israel ibas kamarna, sementara nabi Elisa ndauh ije nari banci ietehna kai rencana raja Aram enda. Paksa si e nabi Elisa lit i daerah Dotan. Ibas ayat selanjutna ituriken maka kota Dotan enda ikepung prajurit Raja Aram, tapi ibas toto nabi Elisa maka teridah ije ituduhkenna man singikutken ia, maka lebih enterem prajurit Dibata si ngkawali ia, seh pe maka prajurit Aram enda ndai buta matana, lanai idahna Elisa, ra uga nabi Elisa ngatakenca maka kalak Aram enda enggo papak, ras naruhken ia ku kuta kalak Samaria. Ibas enggo seh kalak Aram enda i kuta Samari, emaka arah toto nabi Elisa ka, maka kalak Aram enda enggo banci erpengidah, tapi sengget ia sebab enggo ia itengah-tengah bangsa Samaria, si tentu saja e berarti ia enggo ndahi sarang singa ntah pe menyerahken dirina ku jebaken Nabi Elisa. Seh pe maka nina Raja Israel, Yoram si menggantiken Ahazia, uga akandu adi ibunuh kami kerina kalak enda? Nina man nabi Elisa? Tapi erjabab Elisa nina, ula, tapi bere man lah kalak enda, kenca bage pelepas ia mulih ku Aram. Si idah ibas ayat terakhir maka, lanai lit bangsa Aram reh ku Israel.

Tangkas man banta maka, Elisa sekalak nabi si melala mengalami perkuah ate Tuhan ibas kegeluhena, tapi pe melala ka perbeben si reh kempak ia, si la bagi ukurna, tapi siidah kai siibahanna, labo ia membalas perbahanen kalak Aram enda ndai alu ertoto man Dibata gelah ikernepken, tapi bagi kata Dibata, ”iberekenna man Dibata guna nehken rawana”.
Kita pe megati menghadapi perbeben ibas kegeluhenta si la bagi ukurta, ntah ibas jabu, itengah lingkungenta, gerejanta, bangsa ras pe negaranta enda, erbage-bage si terjadi si nderpa kita seh maka maun-maun turah biak-biak duniawi ibas pusuhta guna erbalas pe.

Mari dage, sipetangkas ras si gejapken kata Dibata enda jadi ciken man banta guna nambahi kiniketenta labo saja terjeng erbahan si benar, erbahan si ngena ate temanta, tapi terdauhen pe, mari si endesken alu bulat ukur, perbebenta e man Dibata guna kesempaten man Dibata erdahin ibas kegeluhenta, ras tek kita ibas paksana, adi megenggeng kita, sialoken me bekas pendahin Dibata e.

Dibata gelah simasu-masu kita. Bujur man Dibata, bujur man banta kerina.

Nats : Roma 12:19a , II Raja-Raja 6:14-23, I Petrus 3:9-12

Tabi ras Mejuah-juah,

Pt.Mascottaria Purba
http://gbkpinfo.to.md
mascot.taria@gmail.com (YM: mascottaria)