OH PERTUA, OH DIAKEN

Tualang, 25 Januari 2008

Syaloom,

Ibas sada kesempaten, lit sada Perpulungen si atena erbahan penyisipen guna nambahi sierdahin Tuhan eme 2(dua) kalak Pertua ras 1(sada) kalak Diaken, alu bage calon si arus ibuat eme, Calon Pertua 4(empat) kalak, ras Calon Diaken 2(dua) kalak. Memang payo kang ari, adi lit pemilihen si erdahin Tuhan, tuhu beda kal ras Pemilihen ibas struktur pemerintahen, misalna saja Ketua RT ntah RW, teridah tuhu-tuhu antusias ras dem semangat, mungkin salah sada faktorna eme, ibas struktur Pemerintahen e, enggo jelas lit keuntungan finansial (gaji) ras uang masuk si debanna, tapi adi jadi Serayaan, si megati ialoken sebalikna, uang keluar ras “korban perasaan”.

Lit piga-piga kalak Pengurus Kategorial si mbaru itangkuhken ibas sada Kebaktin Perminggun, nina Pandita man Pengurus e, “Dahikenlah dahindu, tempa-tempa kam erdahin guna Tuhan, labo guna Manusia..”.
Kai hubungenna ras cerita pertama ndai, tentu salah sada palas sierdahin epe, eme erdahin guna Tuhan labo guna Manusia, maka labo mamang ateta, adi enterem denga ngawan kurang “berminat” jadi Serayaan.

Lain lubuk, lain ikannya, bage nina pribahasa, lain daerah, lain ka kebiasaan si lit ije, bagem kira-kira pengertinna. Ibas ingan si deban, kerincuhen guna jadi Serayaan enda cukup luar biasa perbahan piga-piga motivasi, deba memang atena kin guna melayani Tuhan, deba ka guna ngayaki prestise ntah pe status sosial.
Adi motivasi si peduaken enda, tentu labo payo, sebab sebagai Pelayan Tuhan, jadi Serayaan, labo lit si harus ibanggaken seakatan bagi ninta perlebe ndai, perbahan e dahin Tuhan, sidahiken guna Tuhan labo guna Manusia.

Perdalanen pendahin Serayaan Tuhan, piga-piga kasus banci jadi perlu tetap lit dukungen total arah ngawan perpulungen, ras keluarga. Melala dahin-dahin Pertua ras Diaken si la banci idungi alu mehuli ntah pe la banci idahiken perbahan kurang bahkan la lit dukungen Perpulungen ras Keluarga (Nora/Naras ras Anak-anak), sierbahanca mawen-mawen sierdahin Tuhan e harus extra kerja keras ibas mbagi ukur ras waktuna ibas dahin rutinitas guna ncari keperluun isi jabuna ras sada sisi harus ka tetap ndahiken dahin selaku Serayaan. Kata Dibata, darami lebe kinirajaan Surga….., enda kata pergegeh man banta kerina, tapi adi dukungen siibereken man Serayaan e tuhu-tuhu mejile, maka hasil sininanami kerina pihak siterkait pe mbera-mbera maksimal ka.

Dibata gelah simasu-masu kita. Bujur man Dibata, bujur man banta kerina.

Tabi ras Mejuah-juah,

Pt.Mascottaria Purba
http://gbkpinfo.to.md
mascot.taria@gamil.com (YM: mascottaria)